تعلمتي على الإيميل
للشاعر فهد معتوق صقر الحوسني
http://www.youtube.com/watch?v=q53h0PmwJ2E
تعلمتي على الإيميل و عندك عالمسنجر ناس
حلفتي لي صديقاتك... و ياما كذّب الحالف
صدفه ساقها ربي و بلا قصد ٍ عرفت الـ Pass
فتحته و شفت كم صوره معاهم كم رقم هاتف
انا وش ذنبي يوم اني عطيتك صادق الإحساس؟
لعبتي فيه و ما صنتيه بكذب احساسك الزايف
ترى عرق اللذي مثلك و لو طال الزمن دساس
و اذا فيك الغدر مذهب .. ترى مسموحه ما يخالف
عرفته مذهب امثالك و كل شي راجع ٍ للساس
و انا ما عاد يعنيني .. غرامك صار شي سالف
طفح قدرك من الزحمه .. طلع ما فيه بلا ملاس
فضح امرك غباء و طيش و قلبي صار بك عارف
فضيحه ذوقك الواطي .. محتفظه بصور ( نسناس ) ؟!
عمى يعميك يا فلانه .. على الصوره تراه صارف
قعد يومين يتكشخ و على كرسي المصور خاس
رتوش و رسم لعيونه و خشم لوجهه مخالف
و صورة ذاك المعضّل مصور لك بدون لباس
صحيح اللي اختشوا ماتوا.. فقدته ذوقك التالف
قوية عين ما تخيلين و لا تحشمين عالي الراس
قليلة اصل من يومك.. انا الغلطان انا عارف
لكن والله ما ارجع .. قدرك تحت رجلي انداس
بعد ما خنتي الباقي و بدلتيه بالذالف
عيشي اليوم ندمانه و ذوقي الهم و الوسواس
و انا غيرك بيوفي لي و يضمّد جرحي النازف
بكمل لك بعد ساعه .. متأخر و عندي Class
اذا في وقت تنتظرين .. على الإيميل بنتشاوف
و اذا مشغوله لكي عذرك.. عندكي دوري عندك كاس
مثل جدر الهريس اصبحتي .. كل من يغرف و طايف
رخيصه و بيزه ما تسوين .. و حبك قمة الإفلاس
و من مثلي رفيع الشان حرام وياك يتوالف
لعبتي من ورا قلبي .. و فضح لعبك شديد الباس
و اذا غمضت انا في يوم .. ترى رب الملا شايف
